ياء المتكلم وياء الملكية .. أسئلة كتير عن الفرق بين ياء المتكلم وياء الملكية .. وناس كتير بتتلخبط بينهم ..

السلام عليكم يا أحلى أعضاء ..


ياء المتكلم وياء الملكية ..
ـــــــــــــــــــــــــــــــــــــــ

أسئلة كتير عن الفرق بين ياء المتكلم وياء الملكية .. وناس كتير بتتلخبط بينهم ..

أولا فيه حاجة مهمة جدا لازم نوضحها ..

ياء الملكية هى نوع من أنواع ياء المتكلم ..
بمعنى إن ياء الملكية ياء متكلم أصلا ..

طيب إيه الفرق ؟؟

الأول نعرف يعنى إيه ياء متكلم و إيه هى ؟؟؟

ياء المتكلم ضمير متصل ( شرحنا الفرق فى دروس الضمائر ) .. هو عائد على اللى بيتكلم نفسه ..

سواء كان معناه إن الشيء اللى باتكلم عنه ملكى أو إن الفعل وقع على أنا .. فى كل الحالات يعود على المتكلم نفسه ..
مثلا ..
ـــــــــ
كتابى .. أبى .... هنا أضفت ياء للاسم علشان أقول إنه بتاعى ( ملكى ) ..
و فى الحالة دى ممكن نوصفها بياء ملكية ..
وهانعربها ضمير مبنى فى محل جر مضاف إليه ( لأن كل الضمائر مبنية )

أكرمنى .. ضربنى ......... الياء اللى فى آخر الفعل حطيناها علشان نوضح إن الفعل ده وقع على أنا .. يعنى أنا المفعول به
وهنا اسمها ياء متكلم .. ونعربها ضمير مبنى فى محل نصب مفعول به ..
ملحوظة صغيرة .....
ــــــــــــــــــــــــــــ
لما نضيف ياء المتكلم للفعل لازم نحط قبلها نون اسمها (نون الوقاية ) و دى بنضعها علشان نقى الفعل ونحميه من حركة الياء .. ومالهاش أى محل من الإعراب ..

طبعا فى السن الصغير زى سنة أولى مابياخدوش الكلام ده أنا وضحته للناس اللى متلخبطة ..
.. بياخدوا ياء الملكية فقط ..

طيب أوصلها لابنى ازاى ؟؟
هاقوله دى ياء بتحبنى جدا و دايما تيجى تقف بعد الاسم علشان تخلى الحاجة اللى باتكلم عليها بتاعتى ..
مثل
قلم .... قلمى
كتاب ... كتابى
مدرسة .... مدرستى

** فى آخر كلمة ( مدرسة ) آخرها تاء مربوطة .. هنا حولناها لتاء مفتوحة ..
يبقى فيه قاعدة لازم ابنى يحفظها كويس قوى .. أغنية صغيرة يقولها دايما ..

( تقابلنى تاء مربوطة .. أفتحها و أحط ياء )

يعنى القاعدة إنى دايما أحط الياء شابكة فى آخر حرف فى الكلمة .. لكن لو قابلتنى تاء مربوطة فى الآخر مش هاعرف أشبكه فيها .. يبقى أفتحها ( أخليها تاء مفتوحة ) و أحط الياء .. أشبكها فيها ..

1 التعليقات:

إضغط هنا لـ التعليقات
غير معرف
18 نوفمبر 2014 9:19 م ×

بارك الله فيك

مدونة البوابة التعليميةغير معرفtalem-eg.blogspot.com
رد
avatar
شكرا لك ولمرورك