الحركات فى اللغة العربية .. الثلاث حركات الأساسية فى اللغة هى { الفتحة _ الكسرة _ الضمة }

الحركات فى اللغة العربية ..

ــــــــــــــــــــــــــــــــــــــــ
الثلاث حركات الأساسية فى اللغة هى { الفتحة _ الكسرة _ الضمة }
ولتسهيل تعليمهم لأولادنا نعرفهم إن اسم كل واحدة فيهم مرتبط بحركة الفم فى نطق الحرف وبمكان وضعها على الحرف ..

* الفتحة .. يعنى نفتح فمنا لفوق .. لفوق يبقى نكتبها فوق الحرف بَ ..
* الكسرة .. يبقى بنكسر فمنا لتحت .. تحت يبقى نكتبها تحت الحرف بِ ..
* الضمة .. بنضم فمنا فى نطق الحرف .. ولما نضم فمنا بيعمل دائرة .. يبقى نكتبها دائرة بس ليها ديل صغنن بُ ..

ـــــــــــــــــــــــــــــــ

بعد كدة السكون ..
ودى بتكون على الحرف اللى وقفنا عليه ومانطقناش معاه لا فتحة ولا ضمة ولا كسرة ..
وبتكون على شكل دائرة صغيرة نكتبها على الحرف .. بْ ..

ـــــــــــــــــــــــــــــــ

التنوين ..
ـــــــــــ
هى نون ساكنة زائدة تضاف لآخر الكلمة .. والنون دى تنطق ولا تكتب ..

طيب ازاى أولادنا يفرقوا بين الكلمة اللى فيها تنوين أو لأ فى الإملاء ؟؟
نطلب منهم لما يسمعوا كلمة آخرها نون يشيلوا النون منها لو نفع نشيله منها ومعنى الكلمة ماتغيرش يبقى تنوين لو مانفعش يبقى مش تنوين والنون جزء من الكلمة ..

مثلا .. بنتٌ .. تنطق بنتُن .. لو شيلنا النون هاتبقى بنت .. الكلمة معناها ماتغيرش ..
ـــــــ
يبقى ده تنوين ..
إنما إيمان .. لو حبينا نشيل النون هاتكون إيما .. مش هاتنفع يبقى النون هنا أصلية ..

والتنوين ثلاثة أنواع .. ويكون بكتابة الحركة مرتين جنب بعض ..
* بالضم .. بٌ ..
* بالكسر .. بٍ ..
* بالفتح .. وده لازم نحط بعده ألف .. والتنوين يا بنات مايتكتبش أبدا على الألف .. يتكتب على الحرف اللى قبله .. بًا ..

## والتنوين يا بنات مالهوش فائدة لغوية ولا ليه قاعدة نحطه امتى .. كل فائدته سماعية .. لتحسين وقع الكلام على الأذن .. بس ..

ـــــــــــــــــــــــــــــــــــــــــــــــ

ضبط آخر الكلمات ..
ـــــــــــــــــــــــــــــ
ضبط آخر الكلمة مرتبط بموقعها فى الجملة .. بيتغير مع تغيير مكانها ..
لكن لو الكلمة مفردة من غير جملة .. بتكون خبر لضمير مستتر تقديره هذا أو هذه ..
مثلا كلمة .. ولد ..
تقدير الكلام ( هذا ولد ) ..
فبيكون عليها ضمة .. ولتحسين السمع فى العادة بنحطلها تنوين الضم .. ولدٌ ..

4 التعليقات

إضغط هنا لـ التعليقات
غير معرف
29 نوفمبر 2013 9:15 م ×

ممتاز

رد
avatar
غير معرف
3 مارس 2014 9:39 م ×

بارك الله فيك

رد
avatar
غير معرف
5 مارس 2014 5:40 م ×

شكراااااااااااااااااااا

رد
avatar
غير معرف
18 نوفمبر 2014 9:17 م ×

ممتاز جدا

رد
avatar
شكرا لك ولمرورك